Depresioni është një nga ato sëmundje që kanë qenë “në hije” për një kohë të gjatë. Megjithatë, sot depresioni është në qendër të vëmendjes pikërisht sepse shkaqet e tij kërkohen edhe në gjenetikë dhe predispozita familjare.

Në qendër të shumë studimeve

Në fakt, ka kërkime të shumta që kanë treguar se sa mund të jetë i trashëgueshëm depresioni. Kjo lloj patologjie tenton të përsëritet në të njëjtën familje, sikur të ishte trashëguar nga prindërit dhe, në veçanti, një rrezik 2-3 herë më i madh për të vuajtur nga depresioni është vërejtur nëse një prind preket prej tij.

Nga nëna tek vajza

Në veçanti, duket se ekziston një linjë precize “gjenetike” e transmetimit të depresionit nga nëna tek vajza. Kjo trashëgimi tërësisht femërore u demonstrua nga hulumtimet në Kaliforni, të publikuara në “Journal of Neurosciences”. Rezultatet vërtetuan se qarku i trurit përgjegjës për emocionet, ndryshimet e humorit dhe, për fat të keq, edhe predispozita për forma depresive trashëgohet nga nëna.

Faktorët e rrezikut

Megjithatë, faktorët e parë të rrezikut për depresionin janë të tjerë: niveli i stresit, konteksti socio-ekonomik, marrëdhëniet, arritja (ose jo) e qëllimeve dhe objektivave të caktuara. Përkundër kësaj, korrelacioni midis trashëgimisë emocionale të trurit të nënës dhe predispozitave emocionale të vajzave mund të ketë një rëndësi të madhe për studimin e ndryshimeve të humorit dhe gjithashtu, për shembull, sindromën bipolare.

Ky lloj studimi jo vetëm që shërben për të kuptuar më mirë dinamikën e depresionit (edhe pse rastet e studiuara kishin të bënin me familjet e shëndosha), por gjithashtu për të kuptuar më qartë mekanizmat e trashëguar të trurit që qëndrojnë në themel të autizmit ose, për shembull, disleksisë.