Ndryshimi  i  papritur  i rutinës dhe frika nga Covid –19,  padyshim që  kanë një ndikim  të  madh  në  psikologjinë  e  gjithësecilit  prej  nesh.

Të  gjithë  jemi gjendur  përballë  një  situate  të  cilën nuk e kishim  menduar  kurrë , disa  njerëz kanë  filluar ta pranojnë  dhe  të  përshtaten, ndërsa  të  tjerë  refuzojnë  ta pranojnë . Mirëpo, duam apo jo, realiteti është  ky  që  po përjetojmë .

Të  gjithë  jemi të rrezikuar nga ky virus, pa dallim moshe, por ata që nuk po ja dalin  dot ta mposhtin, janë  gjyshërit  tanë.

Mosha  e  tretë  është  kategoria  më  vulnerabël e  shoqërisë dhe  është pikërisht kjo  kategori  ajo  që  po  e  vuan  më  shumë  këtë  situatë. Le të shohim disa arsye:

1. Atyre iu duhet të  dëgjojnë  çdo ditë, pothuajse  në  çdo program televiziv, që  mosha  e tyre është  më  e rrezikuara  dhe  se shumica e atyre që  nuk ja  kanë  dalë mbanë  kanë  qenë  në  moshë  të  thyer
2. Shumë prej  tyre  jetojnë  vetëm
3. Vuajnë nga  disa sëmundje  njëkohësisht
4. Një pjesë  e konsiderueshme ka  vështirësi  ekonomike
5. Gjasat janë  të  mëdha që  të  moshuarit  të  jenë  përballur dhe  me  humbjen e njerëzve  të  dashur, miq apo familjarë (Sidomos  ky fakt bën që  forca e tyre të shterojë)

Të gjitha këto ndikojnë  negativisht në shëndetin e tyre fizik dhe mendor.

Prandaj, kjo grupmoshë  është  ajo e cila ka më tepër nevojë  për ndihmën tonë.

Në  këto ditë  të vështira  njerëzit  janë  solidarizuar dhe shumë prej tyre po ndihmojnë  sa  munden. Ndihmat  kanë të bëjnë  me ushqime  dhe më së shumti ajo që po ndihmohet  është  mosha e tretë, për shkak të vështirësisë ekonomike  dhe  pamundësisë  për të dalë dhe për të bërë pazar.

Sigurisht që ushqimi është një nga nevojat më  bazike të gjithkujt, por  a  mjafton  vetëm kjo? A mjafton vetëm kaq? Sigurisht që  nuk mjafton, ajo që të moshuarit  vuajnë  më  shumë  është  vetmia, sidomos  në  këtë  periudhë  ku ata tashmë  nuk  mund  të bëjnë as shëtitjen e tyre apo të mblidhen me miqtë e tyre dhe familjarët.

Ata  duhet  të  qëndrojnë  të  izoluar, por pasojat  e izolimit social sigurisht që janë  negative , një ndër to është depresioni.

Si mund t’i ndihmojnë fëmijët, prindërit e tyre të moshuar?

Kjo situatë është shumë e vështirë si për prindërit e moshuar që jetojnë vetëm, po  ashtu edhe për fëmijët të cilët e ndiejnë mungesën e tyre, por për shkaqe të  ndryshme  ndodhen  larg  tyre.

Ja disa ide konkrete dhe praktike se çfarë mund të bëjnë fëmijët për prindërit e  tyre në moshë të thyer:

1. Komunikimi me anë të teknologjisë  (facetime, skype). Bisedat që mund  të bëhen  janë  të  pafundme , mund  të  flisni  për  fëmijërinë, për  gatime  të ndryshme , programe  argëtuese televizive, për  nipërit dhe mbesa. Kjo  padyshim  që  do  të përmirësojë gjendjen  emocionale të të dyja palëve. Mirëpo, jo  të  gjithë  kanë  mundësi  dhe  akses  në  përdorimin  e  teknologjisë, e në  raste të  tilla, mund  të  komunikojnë  me  anë  të  telefonit. Në  rastin  që  janë  dy, tre ose më shumë fëmijë, atëherë ata mund  të  bëjnë  një  plan  me  njëri – tjetrin që secili t’i marrë prindërit  në  telefon  në  orare  të  ndryshme,  kështu  dita e tyre do  të  kalojë  më shpejt.
2. Mund të  përgatisin  ushqimet e  preferura  të  prindërve  të  tyre dhe mund  t’i  vendosin  ato, pas  derës  së  tyre (sigurisht  nëse  është  mundësia ,pra nëse  shtëpitë  janë  afër me njëra  tjetrën)
3. Gjithashtu, në  momentin  që  bëjnë  furnizimet  nëpër  supermarket  një  qese  me  ushqime  mund  ta  dërgojnë  tek  shtëpia  e  prindërve  dhe  me  një  surprizë brenda,  psh një letër  ku i shkruajnë  se  sa  shumë  i  mungojnë, ose  ndonjë vizatim  nga  nipërit  e  mbesat. Kjo  sigurisht që do t’i emocionojë  dhe do t’i japë shpresë dhe kurajo.
4. Ka  dhe  gjyshër  të  cilët  kanë  pasur  ditëlindjen  por  për  shkak  të  situates i është  dashur  ta  festojnë  vetëm. Cfarë  mund  të bëjnë  fëmijët  në  këtë  rast? Mund  t’i organizojnë  një  surprizë  edhe  me ndihmën  e  aplikacioneve online që  i ofrojnë  këto  mundësi   dhe  lehtësime. Do të  jetë  një kujtim i bukur  dhe  sigurisht do t’i kujtojë  gjyshërve  dhe  prindërve  që  nuk  janë  vetëm.
5. Fëmijët  mund  t’i  dërgojnë  prindërve  të  tyrë  libra  të  ndryshëm  të  cilët ato preferojnë  apo  edhe  kaseta  ose  CD  me  këngët  e tyre  të  preferuara. Duke  i kujtuar  në  këtë  mënyrë  që  ata  gjithmonë  do  të  kujdesen  për  ta, pavarësisht largësisë  apo  situates, kjo  gjë  padyshim  që  do  i  motivojë  ata  dhe  do të ndihen  më  pozitivë .

 

Dhe si përfundim, disa mesazhe që mund të japim dhe marrim gjatë kësaj periudhe:

• Mundohuni të gjeni pozitiven  në  çdo gjë, edhe aty ku duket e pamundur .
• Po në rastin e Covid 19 cfarë mund të jetë pozitive?
• Eshtë pozitiv fakti që jemi të gjithë bashkë në të njëjtën situate, të gjithë kundër një virusi.
• Jemi të gjithë të barabartë (ndoshta për herë të parë).
• Shumë prej  nesh  kemi kohën  që  gjithmonë e kemi kërkuar me ngulm; le ta shfrytëzojmë (të  kujdesemi  për  veten, të  merremi  me  aktivitete sportive  në  kushte  të  shtëpisë, të  lexojmë  sa  më shumë  dhe  të  bëjmë  gjërat  që  na pëlqejnë).
• Njerëzit po bëhen më solidarë.

Të  gjithë bashkë  do ia dalim, duhet vetëm DURIM DHE KUJDES!