Një përqafim është një manifestim i dashurisë dhe afërsisë dhe mund të përdoret për të demonstruar ose theksuar emocione të ndryshme, nga butësia, te miqësia, dashuria dhe simpatia, deri te rehatia. Por a janë përqafimet të gjitha të njëjta? Shkenca thotë jo. Një grup studiuesish nga Universiteti Ruhr i Bochum-it, Gjermani, pasi kanë ekzaminuar rreth dy mijë përqafime në situata dhe kontekste të ndryshme, në fakt, kanë arritur në përfundimin se zakonisht preferohet përqafimi nga e djathta, por nëse dikush përqafon nga e majta, ka më shumë përfshirje emocionale.

Aeroporti, pika e vrojtimit

Për të kryer hetimin e tyre, studiuesit ekzaminuan rreth një mijë përqafime të shkëmbyera në një aeroport gjerman si në zonën e nisjeve ashtu edhe në atë të mbërritjeve, me synimin për të vëzhguar dhe dalluar përqafimet e motivuara nga emocione të ndryshme, trishtimin kur largoheni, deri te lumturia kur ktheheni. Megjithatë, për të studiuar përqafimet neutrale, autorët e studimit vëzhguan videoklipe të më shumë se 500 përqafimeve të aktorëve që u jepeshin të panjohurve. Dhe në fund përmes një testi ata u kërkuan 120 personave të përqafonin një manekin.

Roli i trurit

“Ky mekanizëm varet nga ndikimi i hemisferës së djathtë të trurit e cila kontrollon anën e majtë të trupit dhe përpunon emocionet pozitive dhe negative”, shpjegon Julian Packheiser, autori kryesor i studimit të botuar në revistën mjekësore Psychological Research.

Burrat preferojnë të majtën

Sipas të dhënave, studiuesit kanë treguar kështu se përqafimet e dhëna në të majtë ndodhin më shpesh në situata më tërheqëse, qofshin ato pozitive apo negative. Përjashtimi i vetëm që vihet re është në përqafimin mes dy burrave, i cili fort tenton t’i jepet të majtës edhe në situata të konsideruara “neutrale” dhe, për rrjedhojë, jo emocionale. Siç shpjegon Sebastian Ocklenburg, i cili mori pjesë në hulumtim, “interpretimi ynë është se shumë burra i konsiderojnë përqafimet me njëri-tjetrin si negative, dhe për këtë arsye priren t’i perceptojnë ato si negative edhe nëse situata dhe konteksti janë neutrale”.

Përqafimi stimulon prodhimin e oksitocinës, hormonit të ndjenjës së mirë dhe ul nivelin e kortizolit, hormonit të stresit.